Revista en lingua galega, de periodicidade mensual en formato papel e online. 

Manifesto fundacional: 

Vivimos un tempo no que os vellos camiños
deixaron de ser seguros e os compases non acertan co
norte. Gobérnanos a invernía.

Queremos prender unha fogueira de ideas, axuntar vontades
e voces e convocar xente do común ao seu redor, á calor
das historias que falan de novos rumbos.

Gustaríanos ser un facho que alume entre a néboa que atolda
a información, que despexe as negruras que nos ocultan mundos
e existencias tan necesarias coma o pan.

Queremos ser refuxio para lectores e xornalistas. Un ecosistema de xéneros xornalísticos ameazados de extinción, de novas narracións e de enxertos de poesía no ensaio.

Aspiramos a ser antídoto do silencio. Por iso reivindicamos
a mellor tradición do oficio: ir, ver, preguntar, escoitar,
valorar e contar.

Queremos coidar do xornalismo que di as cousas como foron, non como convén. Pretendemos aumentar a oferta do
que —aínda— non hai, facerlle un oco a futuros desexables,
e non atender a demanda mansa do que xa abonda.

LUZES é situacionista, é dicir, inconformista e disidente.

É o local universal. O lugar onde pousa a esfera.

A toma de terra da humanidade á que chamamos Galicia.

É o centro excéntrico do librepensamento. O andar ás ceibas.

Mesmo eliximos inimigos: a submisión e a indiferenza.

O contrasinal é a ironía.

Prendamos as Luzes

Revista Luzes

Org chart

Teams

Offices